Mayın 31-də Ankara Dövlət Opera və Balet Teatrında dahi Azərbaycan bəstəkarı Üzeyir Hacıbəylinin anadan olmasının 140 illiyi ilə əlaqədar Azərbaycan-Türkiyə opera sənətçilərinin iştirakı ilə “Zəfər dastanı: Çanaqqaladan Qarabağa” adlı qala-konsert keçiriləcək.
AZƏRTAC xəbər verir ki, Ankaradakı Azərbaycan Mədəniyyət Mərkəzinin Türkiyə Mədəniyyət və Turizm Nazirliyinin Opera və Balet Baş İdarəsi ilə birgə layihəsi əsasında keçirilməsi planlaşdırılan konsert proqramında Üzeyir Hacıbəylinin əsərləri ilə yanaşı, qardaş ölkə bəstəkarlarının da bir neçə əsəri ifa olunacaq.
Konsert proqramını Ü.Hacıbəyli adına Azərbaycan Dövlət Simfonik Orkestrinin dirijoru Mustafa Mehmandarov və Türkiyə tərəfdən Rüstem Rahmedov idarə edəcəklər. İfaçılar sırasında Azərbaycanın Xalq artistləri Azər Zeynalov, Samir Cəfərov, Fidan Hacıyeva, Türkiyənin tanınmış opera müğənniləri Güner Erkan, Ece İşcan, Yiğitcan Tatlıoğlu, İbrahim Sarıpinar, Arda Doğan, Ezgi Bıçıcı və Beste Şahin yer alır. Onları Ankara Dövlət Sinfonik orkestri və TRT Xor Kapellası müşayiət edəcək.
Türkiyədəki Azərbaycan Mədəniyyət Mərkəzindən verilən məlumata görə, mərkəzin direktoru Samir Abbasovla Türkiyə Mədəniyyət və Turizm Nazirliyi Dövlət Opera və Balet Baş İdarəsinin rəhbəri Tan Sağtürk arasında keçirilən görüş nəticəsində iki ölkə mədəniyyət nazirlikləri arasında imzalanmış 2025-ci il üzrə “Azərbaycan və Türkiyə arasında mədəniyyət sahəsində əməkdaşlığa dair yol xəritəsi”nə uyğun olaraq hər iki ölkə sənətçilərinin iştirakı ilə Ankarada Azərbaycan bəstəkarlarının opera əsərlərindən ibarət ortaq konsert proqramlarının təşkili, habelə Üzeyir Hacıbəylinin əsərlərinin Türkiyədə opera ilə bağlı konsertlərin daimi repertuarına daxil edilməsi razılaşdırılıb.
