İran və ABŞ arasında məlumat mübadiləsi sanksiyaların aradan qaldırılmasına dair danışıqları üzrə məhdudlaşır.
APA xəbər verir ki, bu barədə IRNA-ya məlumatlı mənbə bildirib.
Mənbə İran və ABŞ arasında Qırmızı dənizdəki hadisələrlə bağlı dolayı dialoqu təkzib edib:
“Biz Amerika qəzetinin İran və ABŞ nümayəndə heyətinin Qırmızı dənizdəki hadisələrlə bağlı dolayı danışıqla bağlı iddiasını rədd edirik.
Məlumat mübadiləsi və dolayı danışıqlar yalnız sanksiyaların ləğvi danışıqları çərçivəsində məhduddur”, – məlumatda qeyd edilib.
Qeyd edək ki, “Financial Times” ABŞ və İran rəsmilərinə istinadən Vaşinqtonun İranla gizli danışıqlar apararaq Tehranı Qırmızı dənizdə gəmilərə hücumlar həyata keçirən husilərə təzyiq göstərməyə inandırmağa çalışdığı ilə bağlı yazı dərc edib. Bildirilib ki, Vaşinqtonun İranın genişlənən nüvə proqramı ilə bağlı narahatlıqlarını da ifadə etdiyi dolayı danışıqlar yanvar ayında Omanda baş tutub və bu son 10 ayda tərəflər arasında ilk danışıq olub.
