Arif sandığımız, başbilən ataların fikrinə fikir verin: gözəllik ondur doqquzu dondur. Demək biz daxili gözəlliyi vacib saymırıq, üstəlik zahiri gözəllik də heç nə imiş, əsas geyimdir. On gözəlliyin çoxu – doqquzu dondur. Ona görə geyimimizdə başqalarını düşünürük. Bir-birimizin geyiminə müdaxilə edirik.
“Dəbistan” sözü dilimizdə son dövrlər ilkin mənasından uzaqlaşır. Bu adda ilk uşaq jurnalının olduğu da çoxunun ağlına gəlməz. İndi hər tərəf “Dəbistan”dır. Dəbli dodaqlar, dəbli burunlar, dəbli yan-yörə və s. Dəbli geyim də əvvəldən dəb olub. Dəbi dəbə salmaq, dəbi gözdən salmaq, dəb halını almaq “Dəbistan” yaradıb. Dəblə yaşayanlara “dəbçi”, dəbi qoruyanlara “dəbkeş”, dəbdən zəhləsi gedənlərə “dəbfob”, yaxud “dəbəfob”, “antidəb” nə bilim nə fob demək olar?
Plastik əməliyyatları təbliğ edərək, “gözəl görünün”, “gözəlliyinizin qeydinə qalın” deyərək insanları depressiyaya salırlar. Yəni sənin daxili keyfiyyətlərin vacib deyil, əsas zahirən xoşagələn olmalısan. Çoxu bu cür düşünür, bu məqsədi əmələ çevirib yayır. İndi hamı gözəl görünmək həvəsi ilə kosmetoloji proseslərin ardınca qaçır. Azacıq qüsuru olanlar özündən utanır, adamların arasında sıxıntı keçirirlər. Özündə görünüşcə eyib görənlər təkəbbürlü gözəllərin, qondarma gözəlliyin qarşısında günahkarmış kimi susurlar. Bilirlər ki, onları gizlində ələ salırlar. Bəziləri hətta rəftarında kobudluğa da yol verir. “Yuxarıdan-aşağı” baxışların altında əzilən gözəl olmayanları ruhdan düşməyə qoymamaq üçün onlardakı müsbət cəhətləri təqdir etmək lazımdır. Müsbət cəhətləri görmək, dəyərləndirmək üçün təhsil almağa gərək yoxdur, insanlığımız çatmalıdır. Elmli adamların, kitab oxuyanların arasında ali keyfiyyətlərdən uzaq olanlar az deyillər. Qadınları gözəl görünməyə çağıranların özləri təhsil almışlar deyillərmi?
Deyəsən, ikibaşlı sual oldu.
(Son günlər plastik cərrahların tibbi təhsili olmadığı mövzusu müzakirə edilir)
Yadıma uşaq kimi adamlar düşdü… saflıqda yox aa… şəklə maraq göstərməkdə. Yazı paylşırsan, oxumurlar, şəkil paylaşanda uşaq kitabın yalnız şəklinə baxdığı kimi ancaq şəkilə maraq göstərirlər.
