C.Cabbarlı adına Respublika Gənclər Kitabxanası 15 sentyabr – “Bilik günü” ilə əlaqədar məlumatlandırıcı videoçarxlar və kitabxananın daxilində kitab sərgisi hazırlayıb.
Kitabxanadan AZƏRTAC-a bildirilib ki, “15 sentyabr Bilik günü” adlı videoçarxda Azərbaycanda və bir sıra xarici ölkələrdə qeyd edilən “Bilik günü” ənənəsindən, “məktəb”, “təhsil” anlayışlarının tərifindən söhbət açılır. 2020-2021-ci tədris illərinə dair olan statistik göstəricilər, uzun illər Azərbaycanda qabaqcıl təhsil ocaqlarının siyahısında olan məktəb və liseylərin siyahısı videoçarxda yer alıb. Burada izləyicilər Azərbaycanda Bilik Gününün təhsil edilməsinə dair Prezident İlham Əliyevin müvafiq Fərmanının tam mətni, ümummilli lider Heydər Əliyevin şərəfli “müəllimlik” peşəsi haqqında söylədiyi dəyərli fikirlər ilə də tanış ola bilərlər. Bundan əlavə videoçarxlarda izləyicilərə maraqlı ola biləcək digər faydalı məlumatlar da vardır.
“Bilik günü” münasibətilə kitabxana daxilində hazırlanan kitab sərgisi, həmçinin virtual olaraq kitabxananın sosial şəbəkə səhifələrinə də yüklənib. Burada izləyicilər kitabxanada olan tarix, kimya, riyaziyyat, coğrafiya və digər bu kimi müxtəlif fənlərə dair dərsliklər, ensiklopediyalar ilə tanış ola bilərlər.
