UNESCO-nun Silahlı münaqişələr zamanı mədəni sərvətlərin mühafizəsi Komitəsinin 16-cı iclası işə başlayıb.
AZƏRTAC xəbər verir ki, Azərbaycan silahlı münaqişələr zamanı mədəni sərvətlərin mühafizəsi üzrə Komitənin üzvü kimi iclasda təmsil olunur.
UNESCO-nun Silahlı münaqişələr zamanı mədəni sərvətlərin mühafizəsi üzrə 1954-cü il Haaqa Konvensiyasının İkinci Protokoluna tərəfdaş dövlətlərin 9-cu iclasında qurumun Silahlı münaqişələr zamanı sərvətlərin qorunması üzrə Komitəsinə üzv seçilmiş Azərbaycanı iclasda ölkəmizin təşkilat yanında daimi nümayəndəsi, səfir Elman Abdullayev təmsil edir.
Komitə iclasında katibliyin hesabatı dinləniləcək. Həmçinin 1954-cü il Haaqa Konvensiyası ilə onun iki protokolu və UNESCO-nun digər mədəniyyət konvensiyaları arasında sinerjinin gücləndirilməsi, “Sülh naminə irs” tematik Proqramının həyata keçirilməsi müzakirə olunacaq. 1999-cu il tarixli İkinci Protokolun tətbiqinə dair təlimatlara düzəlişlər müzakirə olunaraq qəbul ediləcək.
İclasın gündəliyinə 1954-cü il Haaqa Konvensiyasının və onun iki Protokolunun (1954 və 1999) həyata keçirilməsi üçün resursların səfərbər edilməsi, Əfqanıstan, Barbados, Burkina-Faso və Meksikaya verilmiş beynəlxalq yardımların icrası haqqında hesabatın, 1954-cü il Haaqa Konvensiyasının və onun iki protokolunun (1954-cü və 1999-cu illər) həyata keçirilməsinə dair milli hesabatların dinlənilməsi, 1999-cu il İkinci Protokolunun icrasının izlənməsi və nəzarət mexanizmlərinin müzakirəsi kimi məsələlər də daxildir.
Qeyd edək ki, 1954-cü il Haaqa Konvensiyasının silahlı münaqişə zamanı mədəni sərvətlərin mühafizəsi haqqında 1999-cu il İkinci Protokolun Silahlı münaqişələr zamanı mədəni sərvətlərin qorunması Komitəsi on iki iştirakçı dövlətdən ibarətdir. Bu dövlətlər ildə bir dəfə toplanır.
Xatırladaq ki, ölkəmiz cari il noyabrın 17-də 2021-2025-ci illər üzrə UNESCO-nun İcraiyyə Şurasına, noyabrın 30-da isə qurumun Silahlı münaqişələr zamanı mədəni sərvətlərinin qorunması üzrə Komitəsinə 4 il müddətinə üzv seçilib.
UNESCO-nun Silahlı münaqişələr zamanı mədəni sərvətlərin mühafizəsi Komitəsinin 16-cı iclası dekabrın 3-dək davam edəcək.
