Bir neçə gün əvvəl İran İslam İnqilabı Keşikçiləri Korpusunun Tehran yaxınlığındakı gizli raket bazasında baş verən partlayışın video görüntüləri internetdə yayılıb. Haqqin.az-ın “The Times of Israel”ə istinadən verdiyi məlumata görə, İsrailin xüsusi kəşfiyyat şirkəti “ImageSat International” gizli qurğunun partlayışdan əvvəl və sonra peykdən çəkilən video görüntülərini yayıb. Kadrlardan görünür ki, sentyabrın 22-də olan obyekt əvvəlcə salamat olub. Sonra bloklarından birində ciddi dağıntı olub.
Söhbət İslam İnqilabı Keşikçiləri Korpusunun “Shahid Hemmat Industrial Group”un zavodundan gedir. Bu şirkət İranın ballistik raket proqramının bir hissəsidir və uzaq mənzilli “Şahab-3” raketləri istehsal edir.
Peyk görüntülərinə görə, binanın ən azı dörddə biri məhv edilib.
Bu həftə bazar ertəsi İslam İnqilabı Keşikçiləri Korpusu Tehran yaxınlığındakı “araşdırma mərkəzlərindən” birində “yanğın” olduğunu və iki əməkdaşın öldüyünü açıqlayıb.
Dağıntıların miqyasının əslində daha da böyük olması mümkündür. Bəzi rus mənbələri hətta obyektdə nüvə başlıqlarının olduğunu iddia edir.
