Amerika Kino Sənəti və Elmləri Akademiyası tviter səhifəsində tamaşaçıların səsverməsinin nəticələrinə əsasən veriləcək “Oskar” mükafatlarına namizəd filmlərin siyahısını dərc edib.
AZƏRTAC kulturomania.ru saytına istinadla xəbər verir ki, siyahıda “Hörümçək adam 3: Geriyə yol yoxdur”, “Avengers 4: Final”, “Matriks”, “Arzuladığım qızlar” və “Zak Snayderin ədalət liqası” filmləri yer alıb. Tamaşaçılar adları çəkilən filmlərə səs verə bilər.
Xatırladaq ki, fevralın 15-də Amerika Kino Sənəti və Elmləri Akademiyası mükafatlar sırasına “tamaşaçının zövqü” nominasiyasının əlavə olunduğunu elan edib. Tamaşaçılar #OscarsFanFavorite haşteqindən istifadə edərək akademiyanın tviter səhifəsində bəyəndiyi filmlərə səs verə bilər.
94-cü “Oskar” mükafatlarının təqdimetmə mərasimi martın 27-də Los-Ancelesdə keçiriləcək.
