Allah dərgahında ən uca qatda məskən salanlar Şəhidlərdir. Sonda hamının son mənzili torpaqdır, hamını torpaq udacaq. Torpaq uğrunda döyüşüb torpağı udanlarsa ölü yox, Şəhid olur. Şəhidlər quruca torpağı Vətən edənlərdir. Torpağın övladıdır şəhidlər. Özləri bu dünyadan getsələr də, adları əbədiyaşar olur… Torpaq uğrunda öz övladlarından belə keçib onu bizə əmanət edib Şəhidlər. Odur ki, o övladlar hər birimiz üçün əziz əmanət olmalıdır. Şəhid övladlarının gözlərinə baxmaq, o gözlərin dərinliklərindıki kədəri duymaq insandan ürək istəyir, dözüm, təpər istəyir. İllah da müəllim olasan, şəhid balalarına dərs deyəsən.
Vətən müharibəsində şəhid olmuş Musayev Elşən Hüseyn oğlu da Vətənin düşmın tapdağında olmasına dözməyib, üç uşaq atası olmasına baxmayaraq torpağı qorumaq yolunu seçdi. O bu yolun sonunda qan-qada, şəhadətlik zirvəsinin olduğunu yaxşı bilirdi. Ancaq övladlarını nə qədər çox istəsə də,Vətən qeyrəti onu bu yoldan çəkindirmədi. Vətən müharibəsi başlayanda Elşən Musayev də döyüşlərə qatılmış, Cəbrayıl və Füzuli rayonu uğrunda gedən döyüşlərdə iştirak etmiş, 8 oktyabr 2020-ci ildə şəhid olmuşdur. Onun doğum günü şəhidin ailəsinin yaşadığı Qaradağ rayonu, Müşfiqabad qəsəbəsində hər il qeyd olunur, xatirəsi əziz tutulur, anılır. Musayev Elşənin üç övladı: Ayşən ,Hüseyn Dəryanur Qubadlı rayon Teymur Müskanlı kənd tam orta məktəbində təhsil alır. Atalarının adını uca tutmaq üçün səylə çalışan bu balaların gözlərinə baxanda bu torpağın, bu Vətənin nə qədər dəyərli və əziz olduğunu bir daha dərindən dərk edir, anlayır, arınır, təmizlənirsən.
Elşən Musayev 1988-cı ilin iyunun 21-də Ağsu rayonunda anadan olmuşdur. O, 2005-ci ildə Ağsu şəhər 3 saylı tam orta məktəbini bitirmiş, həmin ildə hərbi xidmətə yollanmışdır. 2006-cı ilin oktyabrında hərbi xidmətini başa vurmuşdur. 2014-cü ildə N saylı hərbi hissənin həmlə taborunda xidmətə başlamışdır. Şəhid Elşən Musayev göstərdiyi qəhrəmanlıqlara görə ölkə başçısı cənab İlham Əliyevin Sərəncamları ilə ölümündən sonra “Vətən uğrunda”, “Cəbrayılın azad olunmasına görə” və “Füzulinin azad olunmasına görə” medalları ilə təltif olunmuşdur. Xalqımız ötən il sentyabrın 27-dən noyabrın 10-dək davam edən 44 günlük Vətən müharibəsində güclü həmrəyliyin, yenilməz ruhun bir daha şahidi oldu. Vətən müharibəsində Azərbaycan gəncliyi vətənpərvərliyini, əzmini bütün dünyaya nümayiş etdirdi. Onların vətənpərvırlik məktəbindən hələ nə qədər gənc dərs alacaq. Onların əmanət qoyduğu Vətəni və övladları qorumaq hər bir azərbaycanlının borcudur.
Allah Şəhidlırə rəhmət eləsin.
