ABŞ-da Respublikaçılar Partiyasından prezidentliyə namizəd Donald Tramp Demokratlar Partiyasından rəqibi, hazırkı vitse-prezident Kamala Harrisi siyasi platforması üçün təşəbbüslərini oğurlamaqda ittiham edib.
“Report” xəbər verir ki, bu barədə siyasətçi ona məxsus olan “Truth Social” sosial şəbəkəsində yazıb.
“Bal ayı dövrünün sonuna yaxınlaşan və anketlərdə pis uduzmağa başlayan Kamala Harris sadəcə mənim vergi siyasətimi kopyalayır. Fərq ondadır ki, o bunu həyata keçirməyəcək və bu yalnız ona siyasi məqsədlər üçün lazımdır. Bu, Trampın ideyası idi, onun öz ideyaları yoxdur. İdeyaları ancaq məndən oğurlaya bilər”, – Tramp öz səhifəsində qeyd edib.
Qeyd edək ki, Harris Nevada ştatının Las-Veqas şəhərində keçirilən mitinqdə işçilər üçün nəzərdə tutulan bəxşişlərin vergidən azad olunmasından danışıb. Bundan əlavə, o, ABŞ-da qiymətlərin aşağı salınması üçün tədbirlər görəcəyini vəd edib. Halbuki, Tramp əvvəllər də bəxşişlərin vergiyə cəlb edilməsinə qarşı olduğunu bəyan edib.
