Azərbaycan yazıçı Zahirə Cabirin “Əvvəl zaman içində” kitabı Bolonya Beynəlxalq Uşaq Kitab Sərgisi çərçivəsində Beynəlxalq Uşaq Kitabı Şurasının (IBBY) Hans Kristian Andersen mükafatına layiq görülüb.
Bu barədə AZƏRTAC-a məlumat verən uşaq yazıçısı, şairə, “İrs” Nağıllar evinin rəhbəri, professor, akademik Solmaz Amanova bildirib ki, mükafata namizədlər Beynəlxalq Uşaq Kitabı Şurasının milli bölmələri tərəfindən irəli sürülür, hər iki ildən bir təqdim olunur.
“Zahirə Cabirin “Təhsil” nəşriyyatında çapdan çıxmış kitabı bu mötəbər qurumun qırmızı diplomuna layiq görüldü, mükafatı qurumun nümayəndəsi təqdim etdi. Bu münasibətlə bütün uşaq yazıçılarını, illüstratorları ürəkdən təbrik edirəm”, – deyə o bildirib.
Azərbaycanın Bolonya Beynəlxalq Uşaq Kitab Sərgisində iştirakından danışan Solmaz Amanova qeyd edib ki, ölkəmiz üçün bu sərgi həyəcanlı və çoxdan gözlənilən debüt idi: “Azərbaycan müasir tarixində ilk dəfə olaraq burada uşaq ədəbiyyatının ən yaxşı nümunələrini təqdim etdi. Uşaq ədəbiyyatının bu bayramında 95 ölkə və bir çox müxtəlif nəşriyyatlar iştirak edirdi. Kitablarımız dünyaya təqdim edildi və bir çox ölkələrin marağına səbəb oldu, müxtəlif nəşriyyatlarla danışıqlar aparıldı”.
Bundan başqa, sərgi çərçivəsində Solmaz Amanovanın “Yaşıl portal” kitabı Yaponiya Nəşriyyatının marağına səbəb olub və kitabın yapon dilinə tərcümə edilməsi qərara alınıb. Kitab, həmçinin türk dilinə də tərcümə olunacaq. Eyni zamanda, Solmaz Amanovanın “Zəfəran” adlı kitabı ABŞ nəşriyyatına təqdim edilib.
Xatırladaq ki, Azərbaycan martın 31-də öz işinə başlayan və aprelin 3-dək davam edən dünyanın ən böyük uşaq kitab sərgisi olan Bolonya Beynəlxalq Uşaq Kitab Sərgisində xüsusi stendlə təmsil edilib. Sərgidə yerli yazar və naşirlərdən ibarət nümayəndə heyəti iştirak edib, Azərbaycan nəşriyyatlarında azyaşlı oxucular üçün çap edilmiş 160-dan çox adda 200 nüsxədən çox kitab və nəşr məhsulu ziyarətçilərə təqdim olunub.
